Бо тоҷикӣ 
 На русском 
 In English 
Почта Факултетҳо Магистратура Кафедраҳо Суратҷода Мо дар ВАО Ҷадвали дарсӣ Муқовимат бо коррупсия Об барои рушди устувор

Шуъбаи табъу нашр

Шуъбаи табъу нашр дар назди Раёсати Донишкада ташкил шуда, бо фармони ректори донишкада ва роҳбарии бевоситаи муовини ректор оид ба илм фаъолият менамояд. Фаъолияти шуъба аз ҷониби Шӯрои олимони Донишкадаи молия ва иқтисоди Тоҷикистон барои тезонидани суръати корҳои илмӣ ва зиёд намудани потенсиали илмӣ-педагогии донишкада ташкил ва натиҷагирӣ карда мешавад.


Баробари таъсис додани шуъбаи табъу нашр Низомнома, Дастурамали вазифавии сардори шуъба, Дастурамали вазифавии сармуҳаррир ва Дастурамалҳои вазифавии муҳаррирони бахши тоҷикӣ ва русӣ, Дастурамали вазифавии мутахассиси сомонаро тартиб дода, аз рӯи он фаъолият менамояд. 


Фаъолияти шуъбаи табъу нашр гуногунҷабҳа буда, дар он маводҳои таълимӣ, таълимию методӣ, тарбиявӣ, илмӣ-таҳқиқотӣ, аз ҷумла барнома, воситаи таълимӣ, дастури таълимию методӣ, коркарди методӣ, китоби дарсӣ, монография, маҷмуа, брошюра ва ғайра ки аз кафедра ва сохторҳои донишкада ворид мешаванд таҳрир гардида ба Шӯрои илмӣ-методӣ пешниҳод мешаванд. Шуъбаи табъу нашр таҳия ва нашри рӯзномаи «Молия ва иқтисод», ҷамъоварӣ, коркард, таҳрири мақолаҳои илмӣ ва ба чоп омода намудани маҷаллаи илмии «Паёми ДМИТ»-ро ба уҳда дорад. Фаъолияти Сомонаи расмии донишкада низ, ки дар он як нафар мутахассис вобаста аст, ба шуъбаи табъу нашр вогузор карда шудааст.  Илова ба ин, воҳиди кории наворбардор дар шуъбаи табъу нашр вобаста шудааст, ки ҳама чорабиниҳои сиёсӣ, фарҳангӣ ва илмиву тарбиявиро ба навор гирифта, онро тавассути шабакаҳои телевизионӣ пахш месозад. 


Ба шуъба мутахассис ва муҳаррирони касбии соҳаҳои гуногуни илм бо малакаи хуби забондонӣ, асосан забонҳои тоҷикӣ ва русӣ, журналистони касбӣ ҷалб карда шудаанд. Шуъба дар ҳайати зерин фаъолият мекунад:


1. Носиров С.Ш. – сардори шуъба
2. Абдуллоева М.Н. – сармуҳаррири рӯзномаи «Молия ва иқтисод»
3. Ҳакимова Р.Н. – муҳаррири бахши тоҷикӣ 
4. Умарова Б.Х. – муҳаррири бахши русӣ (дар ҳаҷми 0,5 воҳиди корӣ)
5. Муҳиддинов Х. – муҳаррир-суратгир
6. Тӯйчизода Н. – муҳаррир 
7. Ҷобиров Н. – муҳаррир (дар ҳаҷми 0,5 воҳиди корӣ)
8. Сафаров С. – наворбардор (дар ҳаҷми 0,5 воҳиди корӣ)


Бояд гуфт, ки шуъбаи табъу нашр аз Вазорати фарҳанги Ҷумҳурии Тоҷикистон шаҳодатномаи рӯзномаи «Молия ва иқтисод»-ро таҳти № 0330/рз аз 22 октябри соли 2012 ва шаҳодатномаи маҷаллаи «Паёми Донишкадаи молия ва иқтисоди Тоҷикистон»-ро таҳти № 0126/мҷ аз 22 октябри соли 2012 гирифт ва 7 декабри соли 2015 он ба муҳлати се соли дигар тамдид карда шуд.


Бояд гуфт, ки бо муроҷиати раёсати ДМИТ аз ҷониби Корхонаи воҳиди давлатии “Почтаи Тоҷик” маҷаллаи илмии “Паёми ДМИТ” аз 21.09.2016 сол соҳиби шохиси (индекс) 69075 гардид.


Шуъбаи табъу нашр мувофиқи Қоидаҳои ба шабакаи байналмилалии иқтибосӣ-илмии Россия (РИНЦ) шомил кардани маҷаллаи илмии «Паёми ДМИТ» бо ҶММ Китобхонаи илмии электронии ФР дар иртибот қарор гирифт. Ҳамаи бандҳо ва шартҳои дар Шартномаи литсензионии №180-03/2016 ш. Москва, аз 30.03.2016с. дарҷшуда, ки аз ҷониби ҶММ Китобхонаи илмии электронии ФР пешниҳод шудааст, ба талаботи меъёрҳои қонунгузории ҶТ оид ба табъу нашр мувофиқ буда, аз тарафи ДМИТ барои бастани шартномаи литсензионии мазкур бо ҶММ Китобхонаи илмии электронии ФР корҳои омодагӣ идома дорад. Баъди ба шабакаи байналмилалии иқтибосӣ-илмии Россия (РИНЦ) шомил кардани маҷаллаи илмии «Паёми ДМИТ» бояд мақолаҳои илмии дар ин маҷалла дарҷшуда ҷавобгӯи талаботи он бошанд ва даврияти чопи маҷалла риоя шавад, яъне ҳар семоҳа як бор нашр гардад.


Ҷои зикр аст, ки самти дигари фаъолияти шуъба ин омода ва ба чоп расондани рӯзномаи “Молия ва иқтисод” аст. Рӯзнома тамоми ҷабҳаҳои ҳаёти донишкадаро дар саҳифаҳои худ инъикос намуда, моҳе ду маротиба ба теъдоди 4200 нусха нашр мешавад. Он аз 8 саҳифа иборат буда, саҳифаҳои аввал ва охираш ранга аст. Аз аввали таъсисёбӣ 94 шумораи он аз чоп баромадааст. 


Ҳадафи асосии рӯзномаи «Молия ва иқтисод» инъикоси фаъолияти ҳаматарафаи таълимӣ, тарбиявӣ, илмӣ, методӣ ва умуман фаъолияти педагогии рӯзмарраи устодону кормандон ва ҳаёти донишҷӯён аст. Ба қавле ҳар амалу кори пурсамари дар донишкада баргузоршаванда мисли оина дар саҳифаҳои он нашр мегардад.


Ҳамзамон ҳамаи масъалаҳои дар ҷаласаҳои шӯрои олимон, шӯрои илмию методӣ ва раёсати донишкада баррасишаванда дар рӯзнома дарҷ мешаванд.


Бо мақсади рангорангӣ ва ҷолибияти рӯзнома дар саҳифаи ҳаштуми он зодрӯзи кормандон ва устодони донишкада, ҳамчунин кроссворд, шеърҳо ва латифаҳо ҷой дода мешавад.


Ҳаминро бояд зикр намуд, ки рӯзномаи «Молия ва иқтисод» бо раёсати корҳои илмӣ-тадқиқотӣ, шуъбаи робитаҳои байналмилалӣ, шуъбаи тарбия, раёсати таълим ва дигар зерсохторҳои донишкада ҳамкории зич дошта, аз фаъолияти онҳо дар саҳифаҳои рӯзнома пайваста мақола ва хабару гузоришҳо чоп мекунад. Илова ба ин, идораи рӯзнома барои ҷавонони навқалам ва қобилияти эҷодидошта мактаби маҳорати эҷодист, пайваста донишҷӯён ба аҳли эҷоди рӯзнома муроҷиат карда, маслиҳатҳои судманд мегиранд.


Рӯзнома тавассути шуъбаи умумии донишкада ба хонандагон тақсим карда мешавад. Донишкада бо матбааи Ҷамъияти масъулияташ маҳдуди «Мега-принт» ҷиҳати нашри рӯзнома шартнома дорад. 


Бояд зикр намуд, ки аҳли қалами рӯзнома дар тамоми чорабиниҳои донишкада иштирок намуда, аз онҳо дар саҳифаҳои рӯзнома гузоришҳо омода менамоянд. Дар рӯзнома маводи пурмазмуни иттилоотӣ, тарбиявӣ, илмиву оммавӣ, танқидӣ ва фароғатӣ ҷой дода мешавад, ки обишхӯри завқи ҳам устодону ҳам донишҷӯён метавонад бошад.


Бояд гуфт, ки ҳаҷми кор дар идораи рӯзнома рӯз аз рӯз зиёд мегардад. Ҳар рӯз қариб як-ду ва гоҳо аз ин ҳам зиёд чорабинӣ, вохӯрию мулоқотҳо сурат мегиранд, ки ҳамаи онҳо аз назари ҳайати эҷодӣ дур намемонанд. Гуфтан мумкин аст, ки вақтҳои охир намояндагони ташкилоту ширкатҳои хориҷӣ ва ҳамчунин роҳбарҳои муассисаҳои таълимии бонуфузи кишварҳои  хориҷи дуру наздик бо сафари расмӣ ба ДМИТ бо мақсади вусъат додани ҳамкориҳо ташриф меоранд. Дар саҳифаи рӯзнома ва Сомонаи донишкада моҳияти вохӯриву мулоқотҳо ҳатман ҷой дода мешаванд. Ҳамзамон бо супориши ректори донишкада аз ҳамаи чорабиниҳои беруназдонишкадавӣ, ки дар он намояндагони донишкада иштирок менамоянд, мавод омода карда мешавад.


Ҳамаи чорабиниҳо саривақт дар сомонаи расмии донишкада ҷой дода мешавад. Бо Агентии миллии иттилоотии Тоҷикистон (АМИТ) «Ховар», нашрияҳои «Ҷумҳурият», «Омӯзгор», «Боҷу хироҷ», «Молия ваа ҳисобдорӣ», «Тоҷикистон», «Мароми пойтахт» ва дигар матбуоти даврӣ низ ҳамкорӣ карда, дар бораи чорабиниҳои муҳимми аҳамияти ҷумҳуриявию байналмилалидошта иттилоот дода мешавад. Метавон гуфт, ки шуъбаи табъу нашр барои муаррифӣ ва рекламаи донишкада ягона манбаи иттилоот аст.


Дар мавриди паҳн кардани нашрияҳои донишкада ҳаминро гуфтанием, ки дар асоси мактуби Агентии миллии Созмони байналмилалии рақамгузории стандарти китоб «Хонаи китоби Тоҷикистон» (собиқ Палатаи китоб) бояд 3 нусха аз ҳар шумораи чопшудаи рӯзномаву маҷалла ба он ҷо ирсол гардад. Ин корро масъулини рӯзнома баъди ҳар нашри он ба анҷом мерасонанд. Ҳамзамон 2 нусха ба Дастгоҳи иҷроияи Президенти Тоҷикистон, Саридораи ҳифзи сири давлатии назди Ҳукумати ҶТ, 7-нусхагӣ ба Вазорати молияи ҶТ ва Вазорати маориф ва илми ҶТ, 1-нусхагӣ ба Китобхонаи миллӣ ва кафедраи матбуоти факултети журналистикаи Донишгоҳи миллии Тоҷикистон, 1 нусхагӣ ба Китобхонаи Академияи илмҳои Тоҷикистон ба номи И. Ганди ва Сарредаксияи илмии Энсиклопедияи Миллии Тоҷик равона карда мешавад.


Илова ба ин гуфтаҳо, бояд қайд кард, ки донишкада дар шабакаи интернетӣ сомонаи худро дорад ва он ҳамеша фаъол аст. Ҳамаи чорабиниҳои илмиву фарҳангӣ, маърифатию тарбиявӣ, мисли семинару конфронсҳо, маҳфилу мизҳои мудаввар ва дигар хабару воқеаҳои баргузоршуда матн ва расмҳо аз он чорабиниҳо сари вақт дар сомона ҷой дода мешаванд. Бояд гуфт, ки сомонаи расмии донишкада бо забонҳои тоҷикӣ, русӣ ва англисӣ фаъолият дорад, ки чун муаррифгар инъикоси ҳаёти ҳаррӯзаи ДМИТ-ро дар дохил ва дар хориҷи кишвар таъмин менамояд. 


Ишора ба маврид аст, ки фаъолияти сомонаи расмии ДМИТ тадриҷан беҳтар гардида, шакл ва дизайни он низ таҷдиди назар карда шуд. 


Умуман, бояд зикр кард, ки кормандони шуъбаи табъу нашри Донишкадаи молия ва иқтисоди Тоҷикистон дар асоси нақшаи корӣ ва супоришу талаботи раёсати донишкада фаъолияти меҳнатиро дуруст ба роҳ монда, барои иҷрои самараноки нақша ва вазифаҳои ба зиммадоштаашон саъю кӯшиш менамоянд.